اسلام آباد۔29مئی (اے پی پی):وزیراعظم شہباز شریف مانسہرہ اچ پاکستان مسلم لیگ (ن) دے جلسے توں خطاب کریندے ہوئیں آکھیے جو پٹرولیم مصنوعات دل تے پتھر رکھ تے مہانگیاں کیتن ۔انہاں ہزارہ کیتے الیکٹرک کمپنی، میڈیکل کالج دی تعمیر اتے طلبا کوں لیپ ٹاپ ݙیوݨ دا اعلان کریندے ہوئیں آکھیے جوعمران خان ونڄݨ توں پہلے اساں کیتے ڄال سٹیا ، پٹرولیم مصنوعات دل تے پتھر رکھ تے مہانگیاں کیتن ، غریباں کوں ریلیف ݙیندے پیوں ، پنجاب اچ اٹا سستا کرݙتے ، خیبر پختونخوا اچ وی قیمتاں گھٹ کریسوں ، وزیراعلیٰ چووی گھنٹے اچ جواب نہ ݙتا تاں خادم حاضر اے۔وزیراعظم شہباز شریف آکھیے جو نواز شریف پاکستان دی ترقی کیتے ݙینھ رات محنت کیتی، موقع ملیا تاں خیبرپختونخوا کوں پنجاب جیہا بݨا تے ݙکھیسوں ، انا پرست شخص قوم نال دھوکا بازی کریندے ، 50 لکھ گھر وݙی پرے دی ڳالھ اے ھک سلھ نیسی لاتی ، گزریل حکومت اچ لکھاں لوک بے روزگار تھئے، خیبرپختونخوا دےعوام کوں فیصلہ کرݨا ہوسی کون تخریب کار اے تے کون تعمیرکار۔عمران خان آپݨے چھیکڑی ڄہاڑیں اچ تیل دی قیمت گھٹ کیتی عمران خان کوں پتہ ہئی جو او ہر ویندا پئے ، اساکوں مجبوراً تیل دیاں قیمتاں ودھاوݨیاں پئن ، 8 کروڑ لوکاں کیتے سبسڈی دا اعلان کیتے ، یوٹیلیٹی اسٹورز اچ 10 کلواٹا 400 روپے دا ملسی ، خیبر پختونخوا دے وزیراعلیٰ کوں وی آکھداں جو عوام کوں سستا اٹا ݙیو ۔
