اسلام آباد۔30اگست(اے پی پی) مسلم لیگ (ن ) دی مرکزی سیکرٹری اطلاعات مریم اورنگزیب آکھیے قوم کوں انہاں سارے کردار کوں اڄ کچاری اچ گھن آوݨا چاہیدے جنہاں دی وجہ توں پاکستان آئی ایم ایف کوں خیر باد آکھݨ توں بعد ول آئی ایم ایف اچ ڳئے تے معاہدے دی خلاف ورزی تے ڈیفالٹ دے کنارے پڄے۔ آپݨے ھک ٹویٹ اچ انہاں آکھیے ،معاشی تباہی تھئی تے ڈالر اڄ ایں قیمت تے پڄے ،مہانگ غریباں دا جیوݨ حرام کیتے۔ انہاں آکھیے کئیں کوں تکلیف ہئی جݙاں وزیراعظم نوازشریف آئی ایم کوں ہمیشہ کیتے خیر آباد آکھیا؟کئیں کوں تکلیف تھئی جݙاں نواز شریف دے دور اچ پنج سال اٹے، گھیو اتے کھنڈ دی قیمت نی بدلی ؟کئیں کوں تکلیف ہئی جݙاں مہانگ 4 فیصد دی گھٹ ترین سطح تے ہئی تے 14000 میگاواٹ بجلی بݨی ،سستی بجلی اتے گیس ہئی، سستی روٹی ہئی،معاشی ترقی 6.1 فیصد ہئیی؟ ،سی پیک آیا، دہشت گردی مک ڳئی ، نینگراں کوں روزگار ملدا پیا ہئی تاں کیں کوں تکلیف تھئی ؟اڄ قوم کوں ٻل سڑیندے ہوئیں ضرور سوال کرݨا چاہیدے جو پاکستان دی ترقی دے سفر کوں کئیں ساڑیے ؟ اے سازش نوازشریف دے خلاف نی، پاکستان اتے عوام دے روزی روٹی دے خلاف ہئی جیڑھے وڄ وی ایندابھوڳ بھوڳیندے پئن ۔ انہاں آکھیے ماضی اچ جیڑھی نفرت، فساد اتے انتشار دے بج رادھے ڳئن اینکوں آوݨ آلیاں نسلاں بھوڳیسن ۔
