اسلام آباد۔5دسمبر(اے پی پی) نگران وزیرِ اعظم انوار الحق کاکڑ پشاور اچ وارسک روڈ تے دھماکے دی شدید مذمت کریندے ہوئیں زخمیاں کوں بہترین طبّی سہولتاں ݙیوݨ دی ہدایت کیتی اے ۔ وزیر اعظم آفس دے میڈیا ونگ توں جاری بیان موجب وزیرِ اعظم قانون نافذ کرݨ آلے اداریں کوں واقعے دی تحقیقات وختی مکمل کرݨ دی ہدایت کیتی ۔ انہاں آکھیے دہشتگرداں دے پاکستان دے امن کوں تباہ کرݨ دے ناپاک عزائم کوں کݙاہیں کامیاب نہ تھیوݨ ݙیسوں ، ملک توں دہشتگردی دے ناسور دے منڈھوں خاتمے تئیں جنگ جاری رکھیسوں ۔ انہاں یقین ݙیوائے جو واقعے دے ذمہ واراں دی وختی نشاندہی کرتے انہاں کوں قرار واقعی سزا ݙیوائی ویسی ۔ وزیرِ اعظم دھماکے اچ زخمی تھیوݨ آلے ٻالاں دی وختی صحت کیتے دعا منگی اے۔
