چكوال 26 دسمبر (اے پي پي) وزيراعظم عمران خان وئيلي دي چې اپوزيشن چې څنګه پوځ په نښه كوي، په تاريخ كښې د دې مثال نشته، هغه ژبه كارول كېږي كومه چې هند د پاكستان او پوځ په ضد كاروي، په وړومبي ځل اپوزيشن پوځ، سرلښكر او د آئي اېس ائي مشر په نښه كوي، خبرې د جمهوريت كوي او پوځ ته په اقتدار قبضې كولو لپاره وائي، د چا په كرپشن چې د ټولې نړۍ په مجلو او ورځپاڼو كښې مضمونونه چاپ شوي دي او ډاكومېنټرې جوړې شوې دي، نن هغه د غلا پېسه بچ كولو لپاره فشار اچوي، كه دوي ته مو اېن آر او وركړه نو د دې نه لويه غداري به هېواد سره كومه بله نه وي، د يو زوې او د بل لور اېن آر او لپاره غونډې كوي، د دوي قابليت يوازې دا دے چې د دوي پلاران تر ټولو كرپټ دي او دوي د حلال په پېسو نه دي پالل شوي، د عام وګړي په ژوند كښې بهتري راولو، په هېواد به د قرض بوج كم كړو، د ځائي حكومتونو نظام سره به د تعليم ، روغتيا، ګورننس او پوليسو نظام بهتر كړو، داسې منصوبه جوړوو چې په هېواد كښې څوك هم وږې اوده نه شي. ده دا خبرې د خالي په ورځ په چكوال كښې د پوهنتون د بنياد تيګه كېښودو دستورې ته په خپله وېنا كښې وكړې. وزيراعظم عمران خان ووئيل چې خوشحاله يم چې نن په چكوال كښې داسې پروژې راوړلو سره راغلے يم د كومو په نتيجه كښې چې ټولنې بدلېږي، بدلون د ذهن بدلېدو سره راځي. وزيراعظم ووئيل چې چكوال، جهلم او ميانوالي داسې سيمې دي د كوم ځائ نه چې په لويه شمېره خلق په پاك پوځ كښې خدمات ترسره كوي. د دې سيمو خلقو هېواد لپاره قربانې وركړې دي خو له بده مرغه د پاكستان په تاريخ كښې په وړومبي ځل اپوزيشن په پوځ داسې بريد كړے چې په تاريخ كښې ئې مثال نه ترلاسه كېږي. د دې څخه وړاندې په جنرل ﴿ر﴾ مشرف هم تنقيد شوے و خو هغه په سياست كښې و او د هېواد صدر و. اوس چې كومه ژبه د پوځ په ضد كارول كېږي، هغه د هندوستان ژبه ده. هند د پاكستان او د پاك پوځ په ضد پروپېګنډې لپاره داسې ژبه كاروي. اروپائي اېتلاف دا انكشاف كړے چې هند داسې 700 جعلي وېب پاڼې جوړې كړې وې د كومو د لارې به چې د پاكستان او د پاكستان د پوځ په ضد پروپېګنډا كېده. د مړو خلقو او د جعلي ورځپاڼو په نومونو هم وېب پاڼې او اكاٶنټس جوړ كړے شوي وو او مقصد ئې دا و چې د پاكستان په ضد داسې پروپېګنډا وكړې شي چې په پاكستان كښې څوك سرمايه كاري ونه كړي او د پاكستان پوځ كمزورې شي. دا د يو ترهګر او د روګ آرمي په توګه وړاندې كړې شي. دا هم معلومه شوې د دې وېب پاڼو او د اكاٶټس د لارې كوم چې پوځ بدنامولو لپاره كارول كېدې، اے پي ډي اېم پروموټ كولې شو. وزيراعظم ووئيل چې څوك دې د دوي نه پوښتنه وكړي چې كه درغلي شوې نو آيا دوي په كوم فورم د درغلې شكايت كړے، دوي كوم ثبوتونه نه لري ځكه ئې پوځ په نښه كول پېل كړي دي. وزيراعظم ووئيل چې د 30 كلونو نه د پيپلز ګوند او مسلم ليګ ﴿ن﴾ مشرانو هېواد لوټلې. دوي به يو بل ته غله وئيل، د يو بل په ضد ئې مقدمې جوړولې، يو بل ئې په زندانونو كښې اچولي وو او اوس د غلا پېسه بچ كولو لپاره يو شوي دي او پوځ په نښه كوي. وزيراعظم ووئيل چې پاك پوځ هېواد لپاره قربانې وركوي، د پاكستان په ضد چې كومه ترهګري كېږي، مونږ ته معلومه شوې چې د كوم ځائ نه كېږي. وزيراعظم ووئيل چې مونږ د چين نه زده كړي دي چې خپل خلق څنګه د غربت نه بهر كول دي. پنځه كاله پس به په نظر راشي چې غربت ډېر كم شوے. مونږ داسې نظام راوړو چې څوك به هم وږې نه اوده كېږي.
