اسلام آباد۔10اگست (اے پی پی) وزیراعظم محمد شہباز شریف جمہوریہ آذربائیجان دے صدر الہام علیوف نال ٹیلیفون تے ڳالھ مہاڑ کیتی۔ وزیراعظم امریکی صدر ڈونلڈ ٹرمپ دی ثالثی اچ ہݨے آذربائیجان اتے آرمینیا وچال تھیوݨ آلے تاریخی امن معاہدے تے صدر علیوف اتے آذربائیجان دے عوام کوں مبارخ ݙتی۔ وزیراعظم دفتر دے میڈیا ونگ توں جاری بیان موجب آ??ݨی دوستانہ ٹیلیفونک ڳالھ مہاڑ دے دوران وزیراعظم شہباز شریف آذربائیجان اتے آرمینیا وچال ترائے ݙھاکیں پراݨے جھیڑے کوں پرامن طور تے انجام تئیں پڄاوݨ اتے قفقاز دے علاقے کیتے خوشحالی دے نویں دور دا آغاز کرݨ اچ صدر الہام علیوف دے بصیرت آلے کردار دی تعریف کیتی۔ وزیراعظم ایں تاریخی معاہدے کوں منطقی بݨاوݨ اچ امریکی صدر ڈونلڈ ٹرمپ دے کردار دی خاص طور تے تعریف کیتی ۔ صدر علیوف کاراباخ دے معاملے تے آذربائیجان دے نال پاکستان دی پراݨی اتے مسلسل حمایت دی تعریف کیتی ۔ وزیراعظم آکھیا جو “پاکستانی عوام ایں بنیادی مسئلے تے آپݨے آذربائیجانی بھراواں اتے بھیݨاں دے نال ہن اتے اے ڳالھ خوش آئند اے جو صدر علیوف دی ہمت آلی اتے سلیقے آلی قیادت اچ ایں خطے اچ آخرکار امن قائم تھی ڳئے۔ صدر علیوف وزیراعظم شہبازشریف دا شکریہ ادا کریندیں آکھیا جو “خطے اچ پرامن ماحول نال پاکستان اتے وسطی ایشیائی ملکاں وچال ترقی اتے رابطے ودھاوݨ دے نویں موقع پیدا تھیسن۔ ݙوہیں رہنماواں ݙو طرفہ تعاون دے مثبت انداز تے وی اطمینان دا اظہار کیتا۔ لاچن اتے خانکنڈی اچاڄوکی ڳالھ مہاڑ دا ذکر کریندیں وزیراعظم صدر علیوف کوں وختی پاکستان دا سرکاری دورہ کرݨ دی آپݨ?? دعوت دا اعادہ کیتا۔ ݙوہیں رہنماواں دی شنگھائی تعاون تنظیم دے سربراہی اجلاس دے موقع تے تیانجن اچ ملاقات وی متوقع اے۔
